દાળ અને ચોખાના નહીં, માત્ર 5 મિનિટમાં બનાવો બ્રેડ ઢોસા, કદાચ તમે કોઈ દિવસ નહીં ખાધા હોય

દક્ષિણ ભારતીય વાનગીઓનો પોતાનો જ એક ટ્રેન્ડ છે. જો આપણને હેલ્દી અને સારો ખોરાક જોઈએ છે તો આપણે ઈડલી, ઢોસા, સંભાર, વડા, તરફ દોડીએ છીએ. વજન ઘટાડવા માટે ઈડલીને ડાયટમાં સામેલ કરવાનું પણ કહેવાય છે.

આજના સમયમાં ઉત્તર ભારતીય ભોજનની જેમ આ દક્ષિણ ભારતીય ભોજન પણ ખૂબ જ લોકપ્રિય બન્યું છે. આ વાનગીઓને ઘરે બનાવવી પણ ખૂબ જ સરળ છે. હવે ઢોસા ને જ જોઈ લો, તમે તેની ઘણી વેરાઈટીમાં ખાઈ શકો છો જેમ કે સાદા ઢોસા, બટેટા ઢોસા, ડુંગળી ઢોસા, પનીર ઢોસા વગેરે.

આ ક્રિસ્પી વાનગી પેટ પણ ભરે છે અને સ્વાદમાં પણ ટોપ ક્લાસ હોય છે. તેનું ક્રિસ્પી લેયર અડદની દાળ અને ચોખાને રાતભર પલાળીને મિક્સ કરીને તૈયાર કરવામાં આવે છે. કેટલાક લોકો સોજીનો પણ ઉપયોગ કરતા હોય છે.

પણ શું તમે બ્રેડના ઢોસા ખાધા છે? જો ના! અમને ખબર જ હતી, તેથી જ અમે માસ્ટર શેફ પંકજ ભદોરિયાની આ ખાસ રેસીપી તમારી સાથે શેર કરવા જઈ રહ્યા છીએ. શેફ પંકજ તેમની ઇન્સ્ટાગ્રામ પોસ્ટ દ્વારા આપણી સમક્ષ ઘણી સ્વાદિષ્ટ વાનગીઓ લાવે છે.

આવી જ એક પોસ્ટમાં બ્રેડ ઢોસાની રેસિપી પણ શેર કરી છે જે માત્ર 5 મિનિટમાં તરત જ તૈયાર કરી શકાય છે. જો તમને ઢોસા ગમતા હોય, પણ બેટર બનાવવાની ઝંઝટ ન ગમતી હોય, તો તમે આ ઢોસાને બ્રેડ સાથે બનાવી શકો છો. ચાલો જાણીએ કે બ્રેડ ઢોસા બનાવવાની રીત.

સામગ્રી

• 8 બ્રેડ સ્લાઈસ
• 1/4 કપ ચોખાનો લોટ
• 1/4 કપ રવો
• 1/4 કપ દહીં
• 1/2 કપ પાણી
• 2 ચમચી તેલ
• 1/2 ચમચી રાઈ
• 3 સૂકા લાલ મરચા
• 2 કપ છૂંદેલા બાફેલા બટેટા
• 1/2 ચમચી હળદર પાવડર
• 1/2 ચમચી લાલ મરચું પાવડર
• 1/4 કાચી મગફળી
• 1 ચમચી ફ્રુટ સોલ્ટ/ઇનો
• 1/4 કપ બારીક સમારેલી ડુંગળી
• 5-6 મીઠા લીમડાના પાંદડા
• 1 ચમચી આદુ
• સ્વાદ અનુસાર મીઠું

 

View this post on Instagram

 

A post shared by MasterChef Pankaj Bhadouria (@masterchefpankajbhadouria)

બનાવવાની રીત : બ્રેડ ઢોસા બનાવવા માટે બ્રેડની થોડી સ્લાઈસ લો. હવે આ બ્રેડ સ્લાઈસની કિનારીઓને કાપીને અલગ કાઢી લો. હવે તેને એક મિક્સિંગ બાઉલમાં ટ્રાન્સફર કરો અને પછી તેમાં ચોખાનો લોટ, રવો, થોડું દહીં, મીઠું અને પાણી ઉમેરીને એકવાર મિક્સ કરો.

હવે આ બધા મિશ્રણને બ્લેન્ડરમાં નાંખો અને સ્મૂધ બેટર તૈયાર કરો. ધ્યાનમાં રાખો કે તમારા બેટરમાં બ્રેડના ટુકડા દેખાવા જોઈએ નહીં. જો જરૂરી હોય તો, તેને વધુ 1-2 વખત બ્લેન્ડ કરીને પેસ્ટ બનાવો. તેને એક બાઉલમાં કાઢીને બાજુ પર રાખો.

હવે બટાકાનો મસાલો તૈયાર કરો. આ માટે એક કડાઈમાં તેલ ગરમ કરો અને પછી તેમાં રાઈ, સૂકા લાલ મરચાં, કાચા મગફળીના દાણા નાખીને 1-2 મિનિટ સાંતળો. હવે તેમાં બારીક સમારેલી ડુંગળી નાખો અને થોડી સેકંડ માટે હલાવો અને પછી તેમાં ઝીણું સમારેલું આદુ, મીઠા લીમડાના પાંદડા, હળદર અને લાલ મરચું પાવડર નાખીને બરાબર મિક્સ કરો.

તેને ધીમી આંચ પર 2 મિનિટ સુધી રાંધ્યા બાદ તેમાં બાફેલા છૂંદેલા બટાકા ઉમેરો અને એકવાર મિક્સ કરો. બટાકામાં મીઠું અને થોડું પાણી ઉમેરો, તેને ફરી એકવાર મિક્સ કરો, થોડીવાર પકાવો અને ગેસ બંધ કરો.

પાતળું બેટર બનાવવા માટે બ્રેડના મિશ્રણમાં ફ્રુટ સોલ્ટ અથવા ઈનો અને થોડું પાણી ઉમેરો, તેને સારી રીતે મિક્સ કરો અને બાજુમાં રાખો. હવે તવાને ગરમ કરો અને જરૂર લાગે તો તેના પર પાણીનો છંટકાવ કરીને તેને એકવાર લૂછી લો.

હવે બાઉલ અથવા કનછીથી બેટરને રેડીને તવા પર ફેલાવો. તેના પર થોડું તેલ લગાવો જેથી તે ક્રિસ્પી થઈ જાય, ઢોસો બની જાય પછી તેમાં બટેટાનો મસાલો નાખો. તેને ફોલ્ડ કરીને પ્લેટમાં કાઢી લો.

હવે ઢોસાની પ્લેટમાં નાળિયેરની ચટણી અને સાંભાર સાથે રાખો અને સવારના નાસ્તા, લંચ અથવા ડિનરમાં તેનો આનંદ માણો. માત્ર તમને જ નહીં, તમારા પરિવારને પણ આ રેસીપી ખૂબ જ પસંદ આવશે.