આમલીનો ઉપયોગ ખાવાના સ્વાદને બમણો કરવા માટે કરવામાં આવે છે. આમલીની ખટાશ ખાવાના સ્વાદને અદ્ભુત બનાવે છે. પરંતુ જયારે આમલીની ચટણીની વાત આવે ત્યારે, તેનું નામ સાંભળતા જ મોઢામાં પાણી આવી જાય છે. શું તમે પણ ફક્ત આમલીની ખાટીમીઠી ચટણી જ ખાધી છે?
જો તમારો જવાબ હા છે, તો ચાલો તમને જણાવીએ કે તમે આમલીની ચટણી એક નહીં પરંતુ તમે 3 રીતે ઘરે બનાવીને ખવડાવી શકો છો. તમે આ ચટણીઓને સમોસાથી લઈને ચાટ સુધીની કોઈપણ વસ્તુ સાથે પીરસી શકો છો. અમને વિશ્વાસ છે કે આમલીની ચટણી આ રીતે પહેલા કોઈએ નહીં બનાવી હોય. તો ચાલો જાણીએ આમલીની 3 અલગ અલગ ચટણી બનાવવાની રેસિપી.
(1) ખાટી-મીઠી ખજૂર આમલીની ચટણી : આમલીની ખાટી-મીઠી ચટણી તમે ખાધી જ હશે. પરંતુ આજે અમે તમને ખજૂરમાંથી બનેલી આમલીની ચટણી કેવી રીતે બનાવી શકાય તે રેસિપી તે જણાવીશું. તો ચાલો જાણીએ ખજૂરમાંથી આમલીની ચટણી બનાવવાની રીત.
સામગ્રી : 1/2 કપ બીજ વગરની આમલી, 1/2 કપ ઠળિયા વગરની ખજૂર, 2 કપ પાણી, 1/2 કપ ગોળ, 1/2 નાની ચમચી વરિયાળી પાવડર, 1 નાની ચમચી ધાણા પાવડર, 1/2 નાની ચમચી જીરું પાવડર, 1 નાની ચમચી કાશ્મીરી લાલ મરચું પાવડર, 1/2 ચમચી સૂકા આદુ પાવડર અને મીઠું સ્વાદ મુજબ.
બનાવવાની રીત : આમલીની ચટણી બનાવવા માટે સૌથી પહેલા એક પૅન લો. પછી પૅનમાં આમલી, ખજૂર અને ગોળ સરખા પ્રમાણમાં નાખો. હવે પેનમાં 2 કપ પાણી ઉમેરો. હવે આમલી, ખજૂર અને ગોળના મિશ્રણને લગભગ 10 મિનિટ સુધી ઉકળવા દો.
જ્યારે મિશ્રણ ઉકળવા લાગે ત્યારે તેમાં 1/2 ચમચી વરિયાળી પાવડર, 1 ટીસ્પૂન ધાણા પાવડર, 1/2 ટીસ્પૂન જીરું પાવડર, 1 ટીસ્પૂન કાશ્મીરી લાલ મરચું પાવડર, 1/2 ટીસ્પૂન સૂકું આદુ પાવડર અને સ્વાદ મુજબ મીઠું નાખો. હવે સ્પેટુલાથી આમલી અને ખજૂરને મેશ કરો. પછી આ મિશ્રણને ફરીથી 2 મિનિટ માટે ઉકાળો.
હવે આમલી અને ખજૂરનું મિશ્રણ મિક્સરમાં નાખીને સારી રીતે પીસી લો. પછી એક વાસણમાં ચાળણીથી આમલી અને ખજૂરની પ્યુરીને ગાળી લો. તો તમારી ખજૂર અને આમલીની ચટણી તૈયાર છે. હવે આ ચટણીને તમે એરટાઈટ જારમાં ભરીને ફ્રીજમાં રાખો. તમે આ ખજૂર અને આમલીની ચટણીને સેવ પુરી, ભેલ પુરી અથવા પાણીપુરી સાથે મજા માણી શકો છો.
(2) સૂકા લાલ મરચા અને આમલીની ચટપટી ચટણી : એક તો આમલી અને એ પણ ચટપટી, સાંભળતા જ મોઢામાં પાણી આવી જાય છે ને? તમે પણ ઘરે ચટપટી આમલીની ચટણી બનાવી શકો છો. આ માટે તમારે સૂકા લાલ મરચાની જરૂર છે. તો ચાલો જાણીયે બનાવવાની રીત.
સામગ્રી : 1/2 કપ બીજ વગરની આમલી, 2 કપ પાણી, 1/2 કપ ગોળ, 1 ચમચી ધાણા પાવડર, 1/2 ટીસ્પૂન સૂકા આદુ પાવડર, સ્વાદ માટે મીઠું અને તેલ.
બનાવવાની રીત : આમલીની ચટણી બનાવવા માટે સૌથી પહેલા સૂકા લાલ મરચાને એક વાસણમાં પાણીમાં ઉકાળો. પછી સૂકા મરચાને મિક્સરમાં પીસી લો. તમારે જેટલી મસાલેદાર ચટણી જોઈતી હોય તે પ્રમાણે સૂકા લાલ મરચાંનો ઉપયોગ કરી શકો છો. હવે આમલીને ચોખ્ખા પાણીથી ધોઈ લો.
આ પછી એક વાસણમાં ગરમ પાણી મૂકો અને તેમાં આમલીને લગભગ 1 કલાક સુધી પલાળી રાખો. લગભગ 1 કલાક પછી આમલીને સારી રીતે મેશ કરી લો. આમ કરવાથી આમલીના દાણા અલગ થઈ જશે અને તેનો બધો જ રસ આમલીના પાણીમાં ભળી જશે. આ પછી એક વાસણમાં ચાળણીથી આમલીના રસને ગાળી લો. પછી એક પેનમાં તેલને ગરમ કરો.
આ ગરમ તેલમાં ગોળ, મીઠું, આમલીનું પાણી અને સૂકા લાલ મરચાની પેસ્ટને ગરમ તેલમાં લગભગ 15 મિનિટ સુધી પકાવો. જ્યારે આમલીની ચટણી ઘટ્ટ થવા લાગે ત્યારે ગેસ બંધ કરી દો અને ચટણીને ઠંડી થવા માટે બાજુમાં રાખો. તો તમારી ચટપટી આમલીની સૂકા લાલ મરચામાંથી બનેલી ચટણી તૈયાર છે. હવે ચટણીને એક કન્ટેનરમાં સ્ટોર કરો.
(3) ગોળ અને આમલીની મીઠી ચટણી : તમે ગોળ અને આમલીની ચટણીને દહીં-ભલ્લા સાથે ખાઈ શકો છો. સૌથી સારી વાત એ છે કે તમે આ પ્રકારની ચટણી ખૂબ જ સરળતાથી ઘરે બનાવી શકો છો. તો ચાલો જાણીએ ગોળની આમલીની ચટણી બનાવવાની રીત.
સામગ્રી : ગોળ, પાણી, આમલી, મીઠું અને તેલ. બનાવવાની રીત – ગોળની ચટણી બનાવવા માટે સૌપ્રથમ આમલીને પાણીમાં પલાળીને લગભગ 1 કલાક માટે રાખો. હવે એક પેન લો અને તેમાં તેલ ગરમ કરો. હવે તેમાં ગોળ અને મીઠું ઉમેરીને બધી વસ્તુઓને સારી રીતે મિક્સ કરો. હવે તેમાં આમલીનું પાણી ઉમેરો. તમારી ગોળ આમલીની ચટણી તૈયાર છે.
આ બાબતોનું ખાસ ધ્યાન રાખો : આમલીની ચટણીને હંમેશા હવાચુસ્ત કન્ટેનરમાં જ સ્ટોર કરો. કારણ કે હવાના સંપર્કમાં આવવાથી ચટણી જલ્દીથી બગડી શકે છે. એક પણ ખરાબ આમલી આખી ચટણીનો સ્વાદ બદલી શકે છે.
તેથી હંમેશા સારી આમલી જ ખરીદો. મીઠું ઉમેરતી વખતે ખૂબ કાળજી રાખો. ચટણીમાં થોડું વધારે મીઠું પડી જવાથી તેનો સ્વાદ બગાડી શકે છે. અમને આશા છે કે તમને અમારી રેસિપી પસંદ આવી હશે. આવી જ રેસિપી વાંચવા માટે રસોઈનીદુનિયા સાથે જોડાયેલા રહો.
